நியூசிலாந்து, 17 செப்டம்பர் 2026 : இந்தியாவுடனான தடையற்ற வர்த்தக ஒப்பந்தத்தை நடைமுறைப்படுத்துவதற்கான சட்டத்தை நியூசிலாந்து நாடாளுமன்றம் நிறைவேற்றியுள்ளது. இதன் மூலம் இரு நாடுகளுக்கும் இடையிலான வர்த்தகம் மேலும் விரிவடைவதற்கான வாய்ப்பு உருவாகியுள்ளது.
இந்தச் சட்டம் 93-29 என்ற வாக்குகள் அடிப்படையில் நிறைவேற்றப்பட்டது. எதிர்க்கட்சியான தொழிலாளர் கட்சியும் சட்டத்திற்கு ஆதரவு தெரிவித்தது.
இந்த ஒப்பந்தம் நியூசிலாந்து ஏற்றுமதியாளர்களுக்கு உடனடி மற்றும் குறிப்பிடத்தக்க பலன்களை வழங்கும் என அந்நாட்டு வர்த்தக அமைச்சர் டாட் மெக்லே தெரிவித்துள்ளார். இந்த உயர்தர வர்த்தக ஒப்பந்தம் இந்த ஆண்டின் பிற்பகுதியில் நடைமுறைக்கு வரும் என எதிர்பார்க்கப்படுகிறது.
ஒப்பந்தத்தின் கீழ், இந்தியாவுக்கு நியூசிலாந்து ஏற்றுமதி செய்யும் பொருட்களில் சுமார் 95 சதவீதத்துக்கான சுங்க வரிகள் நீக்கப்படும் அல்லது கணிசமாகக் குறைக்கப்படும். இதில் பாதிக்கும் மேற்பட்ட பொருட்களுக்கு ஒப்பந்தம் நடைமுறைக்கு வரும் நாளிலிருந்தே சுங்க வரி இருக்காது.
அதேபோல், இந்தியாவில் இருந்து இறக்குமதி செய்யப்படும் அனைத்து பொருட்களுக்கும் நியூசிலாந்து சந்தையில் சுங்க வரியில்லா அணுகல் வழங்கப்படும். மேலும், அடுத்த 15 ஆண்டுகளில் இந்தியாவில் 20 பில்லியன் அமெரிக்க டாலர் முதலீடு செய்ய நியூசிலாந்து ஒப்புக்கொண்டுள்ளது.
இந்த வர்த்தக ஒப்பந்தத்தில் இரு நாடுகளும் ஏப்ரல் மாதம் கையெழுத்திட்டன. 2026 ஜூன் மாதத்துடன் முடிவடைந்த ஓராண்டில், இந்தியா–நியூசிலாந்து இடையிலான இருதரப்பு வர்த்தகம் 2.29 பில்லியன் அமெரிக்க டாலராக இருந்தது.
இந்த ஒப்பந்தம் நடைமுறைக்கு வருவதற்கு, நியூசிலாந்து மற்றும் இந்தியா ஆகிய இரு நாடுகளும் தங்களது உள்நாட்டு ஒப்புதல் நடைமுறைகளை நிறைவு செய்ய வேண்டும்.
