பினாங்கு, 05 செப்டம்பர் 2026 : மாநிலங்களுக்கு இடையிலான 12 வயதுக்குட்பட்ட தமிழ்ப்பள்ளி மாணவர்களுக்கான ‘Beyond-AIMST தேசிய U12 மாநிலங்களுக்கு இடையிலான கால்பந்துப் போட்டி 2026’ தொடக்க விழாவில் டத்தோ ஸ்ரீ எம். சரவணன் தலைமையேற்று போட்டியை அதிகாரப்பூர்வமாகத் தொடக்கி வைத்தார்.
மலேசியாவின் பல்வேறு மாநிலங்களிலிருந்து சிறுவர்கள் மற்றும் சிறுமிகள் பங்கேற்கும் இப்போட்டி, இளம் கால்பந்து வீரர்களின் திறமைகளை ஒரே களத்தில் வெளிப்படுத்தும் சிறந்த வாய்ப்பாக அமைந்துள்ளது. பினாங்கு போலோ மைதானத்தில் நடைபெறும் இப்போட்டி, விளையாட்டுத் திறனை வளர்ப்பதுடன், மாணவர்களிடையே ஒழுக்கம், குழு உணர்வு, தலைமைத்துவம், விடாமுயற்சி மற்றும் விளையாட்டுப் பண்புகளை வளர்க்கவும் உதவும் என டத்தோ ஸ்ரீ எம். சரவணன் தெரிவித்தார்.
தமிழ்ப்பள்ளி மாணவர்களுக்கு இதுபோன்ற போட்டிகள் மூலம் அதிக வாய்ப்புகளும் வெளிப்பாடும் கிடைக்க வேண்டும் என்றும், அவர்களின் திறமைகளை கண்டறிந்து தன்னம்பிக்கையுடன் வளர இது உதவும் என்றும் அவர் குறிப்பிட்டார். மேலும், போட்டியை சிறப்பாக ஏற்பாடு செய்த MIFA தலைவர் திரு. அன்பா, துணைத் தலைவர் ராஜன், ஏற்பாட்டுக் குழுத் தலைவர் திரு. ஸ்ரீ சங்கர் மற்றும் முழு ஏற்பாட்டுக் குழுவினருக்கும் அவர் வாழ்த்து தெரிவித்தார்.
“ஒவ்வொரு சாதனையாளரின் பயணமும் ஓர் இடத்திலிருந்துதான் தொடங்குகிறது. இந்தப் போட்டி பல இளம் வீரர்களுக்கு சிறப்பான எதிர்காலத்திற்கான தொடக்கமாக அமையலாம்” என டத்தோ ஸ்ரீ எம். சரவணன் தெரிவித்தார்.
