ஷா ஆலாம், 12 ஜூலை 2026 : கெலாப் பெல் தமிழ் மலேசியா ஏற்பாடு செய்த ‘புடவையில் பெண்களுக்கான வாகத்தான்’ நிகழ்ச்சி, ஷா ஆலாமில் உள்ள ஜே.கே.ஆர். செக்ஷன் 17 விளையாட்டரங்கில் உற்சாகமாக நடைபெற்றது.
பெண்களின் உடல்நலம், சமூக ஒற்றுமை மற்றும் தமிழர் பாரம்பரிய உடையான புடவையின் பெருமையைப் போற்றும் நோக்கில் நடைபெற்ற இந்த நடைப்பயணத்தில், 18 முதல் 75 வயது வரையிலான பெண்கள் மூன்று வயது பிரிவுகளாக ஆர்வமுடன் பங்கேற்றனர். 2 மற்றும் 4 கிலோமீட்டர் பிரிவுகளில் நடைபெற்ற நடைப்பயணம், பல்வேறு தரப்பினரின் பாராட்டைப் பெற்றது.
நிகழ்ச்சியுடன் இணைந்து இரத்த தான முகாம், இரத்த அழுத்தம், இரத்தச் சர்க்கரை மற்றும் உடல் நிறை குறியீட்டு (BMI) பரிசோதனைகள், யோகா மற்றும் ஜும்பா உள்ளிட்ட உடல்நல விழிப்புணர்வு நிகழ்ச்சிகளும் நடத்தப்பட்டன. வெற்றி பெற்றவர்களுக்கு ரொக்கப் பரிசு, பதக்கங்கள் மற்றும் சான்றிதழ்கள் வழங்கப்பட்டன. மேலும், பங்கேற்ற பெண்களுக்கு நினைவுப் பதக்கங்களும் வழங்கப்பட்டன.
இந்த நிகழ்ச்சி பெண்களிடையே ஆரோக்கியமான வாழ்க்கை முறையை ஊக்குவிப்பதோடு, தமிழர் பாரம்பரிய உடையான புடவையின் சிறப்பை அடுத்த தலைமுறையினரிடம் எடுத்துச் செல்லும் ஒரு சிறந்த சமூக முயற்சியாக அமைந்தது என ஏற்பாட்டாளர்கள் தெரிவித்தனர். நிகழ்ச்சியில் பல்வேறு பகுதிகளைச் சேர்ந்த பெண்கள் பெருந்திரளாகக் கலந்து கொண்டு நிகழ்ச்சியை சிறப்பித்தனர்.
