ஷா ஆலம், 29 ஜூன் 2026 : மலேசியாவின் பொதுப் போக்குவரத்து துறையில் முக்கிய மைல்கல்லாகக் கருதப்படும் ஷா ஆலம் LRT3 ரயில் பாதையை பிரதமர் டத்தோஸ்ரீ அன்வர் இப்ராஹிம் அதிகாரப்பூர்வமாகத் தொடங்கி வைத்தார்.
இந்த நிகழ்வில் போக்குவரத்து அமைச்சர் லோக் சியூ ஃபூக், சிலாங்கூர் மந்திரி புசார் டத்தோஸ்ரீ அமிருடின் ஷாரி, விவசாய மற்றும் உணவுப் பாதுகாப்பு அமைச்சர் டத்தோஸ்ரீ முகமட் சாபு, அரசாங்கத்தின் தலைமைச் செயலாளர் டான்ஸ்ரீ ஷம்சுல் அஸ்ரி அபு பக்கார் மற்றும் போக்குவரத்து அமைச்சகம், பிரசரணா மலேசியா பெர்ஹாட் ஆகியவற்றின் உயர் அதிகாரிகள் பங்கேற்றனர்.
RM16.63 பில்லியன் செலவில் உருவாக்கப்பட்டுள்ள இந்த LRT3 பாதை, ஜூன் 29 முதல் பொதுமக்கள் பயன்பாட்டிற்கு திறக்கப்படவுள்ளது. இந்த ரயில் சேவை, குடியிருப்புப் பகுதிகள், வணிக மையங்கள், கல்வி நிறுவனங்கள், மருத்துவமனைகள் மற்றும் தொழிற்பேட்டைகளை இணைத்து, மேற்கு கிளாங் பள்ளத்தாக்கின் போக்குவரத்து வசதியை மேம்படுத்தும் என எதிர்பார்க்கப்படுகிறது.
மேலும், பயணிகளின் வசதிக்காக இடைநிலை பேருந்துகள் மற்றும் Rapid KL On-Demand வேன் சேவைகளும் இணைக்கப்பட்டுள்ளன. இந்தத் திட்டம் மக்களுக்கு பாதுகாப்பான, விரைவான மற்றும் குறைந்த செலவிலான போக்குவரத்தை வழங்குவதோடு, வேலைவாய்ப்பு, வணிகம் மற்றும் பொருளாதார வளர்ச்சிக்கும் ஊக்கமளிக்கும் என அரசாங்கம் தெரிவித்துள்ளது.
