ஷா ஆலம், 16 ஜூன் 2026 : மத்திய கிழக்கில் ஏற்பட்ட மோதலைத் தொடர்ந்து உருவான பொருளாதார மற்றும் புவிசார் அரசியல் நிச்சயமற்ற தன்மைகளை எதிர்கொள்ளும் நோக்கில், சிலாங்கூர் மாநில அரசு அறிவித்திருந்த சிலாங்கூர் மீள்திறன் வலுப்படுத்தும் தொகுப்பின் (PPDTS) முதல் கட்டம் இன்று அதிகாரப்பூர்வமாகத் தொடங்கப்பட்டது.
மாநில மக்களுக்கும் பொருளாதாரத்திற்கும் ஏற்படக்கூடிய தாக்கங்களை மதிப்பிடுவதற்கும், பொருத்தமான தலையீட்டு நடவடிக்கைகளை அடையாளம் காண்பதற்கும், சமூகப் பொருளாதாரம், புவிசார் அரசியல், தொழில் மற்றும் எரிசக்தித் துறைகளைச் சேர்ந்த நிபுணர்களுடன் கடந்த ஏப்ரல் 1 முதல் தொடர்ச்சியான கலந்துரையாடல்கள் மற்றும் ஆலோசனைகள் மேற்கொள்ளப்பட்டன. அவற்றின் அடிப்படையிலேயே இந்தத் தொகுப்பு உருவாக்கப்பட்டுள்ளது.
முதல் கட்டமாக, மக்களின் வாழ்க்கைச் செலவைக் குறைப்பது, உணவுப் பாதுகாப்பை வலுப்படுத்துவது மற்றும் மாநிலத்தின் பொருளாதார மீள்திறனை மேம்படுத்துவது ஆகிய நோக்கங்களுடன் ஏழு முக்கியத் திட்டங்களை நடைமுறைப்படுத்துவதற்காக RM140 மில்லியன் ஒதுக்கப்பட்டுள்ளது.
மத்திய அரசின் பல்வேறு பொருளாதார உத்திகள் மற்றும் நடவடிக்கைகள் நாட்டின் பொருளாதார ஸ்திரத்தன்மையைப் பேணுவதில் முக்கிய பங்கு வகித்துள்ளதுடன், உலகளாவிய நெருக்கடியின் தாக்கம் மக்களை பெருமளவில் பாதிக்காமல் தடுக்க உதவியுள்ளதாகவும் தெரிவிக்கப்பட்டது.
PPDTS முதல் கட்டம் அதிகாரப்பூர்வமாகத் தொடங்கப்பட்டுள்ள நிலையில், அறிமுகப்படுத்தப்பட்ட அனைத்து முன்னெடுப்புகளையும் மக்கள் முழுமையாகப் பயன்படுத்திக் கொள்ள வேண்டும் என மாநில அரசு கேட்டுக்கொண்டுள்ளது. சிலாங்கூரின் நல்வாழ்வு, பொருளாதார நிலைத்தன்மை மற்றும் எதிர்கால மீள்திறனை உறுதிப்படுத்துவதில் இந்தத் திட்டங்கள் முக்கிய பங்காற்றும் என நம்பிக்கை தெரிவிக்கப்பட்டுள்ளது.
