14 ஜூன் 2026 : ஐசிசி மகளிர் டி20 உலகக்கோப்பை கிரிக்கெட் தொடரில் ரசிகர்கள் ஆவலுடன் எதிர்பார்த்து காத்திருக்கும் இந்தியா – பாகிஸ்தான் அணிகளுக்கிடையிலான முக்கியப் போட்டி இன்று இங்கிலாந்தின் பர்மிங்காமில் உள்ள எட்ஜ்பாஸ்டன் மைதானத்தில் நடைபெறுகிறது.
உலக கிரிக்கெட்டின் மிகப்பெரிய போட்டிகளில் ஒன்றாக கருதப்படும் இந்தியா – பாகிஸ்தான் மோதல், இந்த முறையும் பெரும் எதிர்பார்ப்பை ஏற்படுத்தியுள்ளது. இரு அணிகளும் உலகக்கோப்பை பயணத்தை வெற்றியுடன் தொடங்கும் நோக்கில் களமிறங்குகின்றன.
போட்டிக்கு முன்னதாக இந்திய அணியின் நட்சத்திர வீராங்கனை ஜெமிமா ரோட்ரிக்ஸ், “வேறு எந்த அணியிடம் தோற்றாலும் பரவாயில்லை, ஆனால் பாகிஸ்தானிடம் தோற்கக் கூடாது” என்று கூறியிருப்பது போட்டியின் முக்கியத்துவத்தை வெளிப்படுத்துவதாக உள்ளது.
இந்தியா மற்றும் பாகிஸ்தான் அணிகள் இடையிலான மகளிர் டி20 போட்டிகளில் இந்திய அணி ஆதிக்கம் செலுத்தி வருகிறது. இதனால் இன்றைய போட்டியிலும் இந்திய அணி மனோபலத்துடன் களமிறங்கும் என எதிர்பார்க்கப்படுகிறது.
எனினும், பர்மிங்காம் பகுதியில் மழை பெய்யக்கூடும் என்ற வானிலை முன்னறிவிப்பு வெளியாகியுள்ளதால், போட்டி பாதிக்கப்படுமா என்ற கவலையும் ரசிகர்கள் மத்தியில் எழுந்துள்ளது.
இங்கிலாந்தில் நடைபெற்று வரும் 2026 மகளிர் டி20 உலகக்கோப்பை தொடர் ஜூன் 12 முதல் ஜூலை 5 வரை நடைபெறுகிறது. இந்த முறை 12 அணிகள் பங்கேற்கும் மிகப்பெரிய மகளிர் டி20 உலகக்கோப்பை தொடராக இது அமைந்துள்ளது.
