கோலா லங்காட், 14 ஜூன் 2026 : உலக நீர் தினத்தையொட்டி, சிலாங்கூர் மாநில அளவிலான 2026 குறைந்த கரியமில தினம் @ கோலா லங்காட் நிகழ்ச்சி இன்று கெளனாங் கடற்கரையில் சிறப்பாக நடைபெற்றது.
இந்த நிகழ்வில் சிலாங்கூர் மாநில பொது சுகாதாரம் மற்றும் சுற்றுச்சூழல் ஆட்சிக்குழு உறுப்பினர் ஜமாலியா ஜமாலுடின், கோலா லங்காட் நாடாளுமன்ற உறுப்பினர் டத்தோ டாக்டர் அக்மாட் யூனுஸ் ஹைரி, மலேசிய விண்வெளி ஏஜென்சியின் தலைமை இயக்குநர் டத்தோ அஸ்லிகாமில் நாபியா, கோலா லங்காட் மாநகராட்சி மன்றத் தலைவர் முகமட் ஹஸ்ரி நோர் முகமது, கோலா லங்காட் மாவட்ட அதிகாரி தெங்கு ரோஹானா தெங்கு நவாவி மற்றும் சிலாங்கூர் நீர் மேலாண்மை வாரியத்தின் (LUAS) முதன்மை உதவி இயக்குநர் ஹஸ்லினா அமர் உள்ளிட்டோர் கலந்துகொண்டனர்.
கோலா லங்காட் மாநகராட்சி மன்றம் (MPKL) ஏற்பாடு செய்த குறைந்த கரியமில தின நிகழ்ச்சி, சிலாங்கூர் நீர் மேலாண்மை வாரியம் (LUAS) ஏற்பாடு செய்த மாநில அளவிலான உலக நீர் தின நிகழ்வுடன் இணைந்து நடைபெற்றது.
நீர் வளங்களைப் பாதுகாப்பது, காலநிலை மாற்றத்தை எதிர்கொள்வது மற்றும் குறைந்த கரியமில வாழ்க்கை முறையை ஊக்குவிப்பது குறித்த விழிப்புணர்வை மக்களிடையே ஏற்படுத்துவதே இந்த நிகழ்வின் முக்கிய நோக்கமாகும்.
நிகழ்ச்சியின் ஒரு பகுதியாக, 3 கிலோமீட்டர் சமூக நடைப்பயணம், கடற்கரை தூய்மைப்படுத்தும் இயக்கம், சதுப்புநில மரக்கன்றுகள் நடுதல், வண்ணமிடும் போட்டி, நகர்ப்புற சுற்றுலாப் போட்டி, கயிறு இழுத்தல், மறுசுழற்சி புத்தாக்கப் போட்டி, இலவச மருத்துவப் பரிசோதனை மற்றும் EcoCash திட்டத்தின் கீழ் பயன்படுத்தப்பட்ட சமையல் எண்ணெய், மின்னணுக் கழிவுகள் உள்ளிட்டவற்றை சேகரிக்கும் நடவடிக்கைகள் நடைபெற்றன.
மேலும், பல்வேறு அரசு முகமைகள் மற்றும் துறைகளின் கண்காட்சி அரங்குகள் மூலம் நீர் வள மேலாண்மை, நதிகள் பாதுகாப்பு மற்றும் சுற்றுச்சூழல் பாதுகாப்பின் அவசியம் குறித்து பொதுமக்களுக்கு விழிப்புணர்வு ஏற்படுத்தப்பட்டது.
நிகழ்ச்சியை வெற்றிகரமாக நடத்த ஒத்துழைப்பு வழங்கிய அனைத்து அரசு முகமைகள், கூட்டாளர்கள், பங்கேற்பாளர்கள் மற்றும் பொதுமக்களுக்கு கோலா லங்காட் மாநகராட்சி மன்றம் தனது நன்றியைத் தெரிவித்தது.
நிலையான வளர்ச்சியையும், சுற்றுச்சூழல் பாதுகாப்பையும் உறுதிப்படுத்த அனைவரும் ஒன்றிணைந்து குறைந்த கரியமில வாழ்க்கை முறையைப் பின்பற்ற வேண்டும் என நிகழ்வில் வலியுறுத்தப்பட்டது.
