13 ஜூன் 2026 : அமெரிக்கா மற்றும் ஈரான் இடையிலான நீண்டகால பதற்றத்திற்கு முற்றுப்புள்ளி வைக்கும் வகையில், இரு நாடுகளுக்கும் இடையிலான அமைதி ஒப்பந்தம் அடுத்த 24 மணி நேரத்திற்குள் கையெழுத்தாகலாம் என்று பாகிஸ்தான் பிரதமர் ஷெபாஸ் ஷெரீப் தெரிவித்துள்ளார். ஒப்பந்தத்தின் இறுதி வரைவு மீது இரு தரப்பும் உடன்பாட்டை எட்டியுள்ளதாகவும், மின்னணு முறையில் ஒப்பந்தம் கையெழுத்திடப்படுவதற்கான ஏற்பாடுகள் மேற்கொள்ளப்பட்டு வருவதாகவும் அவர் கூறியுள்ளார்.
மத்திய கிழக்கில் கடந்த சில மாதங்களாக நீடித்து வரும் மோதலுக்கு தீர்வு காணும் நோக்கில் பாகிஸ்தான் முக்கிய மத்தியஸ்தராக செயல்பட்டு வருகிறது. ஒப்பந்தம் கையெழுத்தான பின்னர், தொழில்நுட்ப மட்ட பேச்சுவார்த்தைகள் அடுத்த வாரம் நடைபெறும் என்றும் ஷெபாஸ் ஷெரீப் தெரிவித்துள்ளார்.
எனினும், ஒப்பந்தம் உடனடியாக கையெழுத்தாகும் என்ற தகவலை ஈரான் தரப்பு எச்சரிக்கையுடன் அணுகியுள்ளது. ஒப்பந்தம் விரைவில் கையெழுத்தாகும் வாய்ப்பு இருப்பதாக ஒப்புக்கொண்டாலும், அதற்கான துல்லியமான தேதி இன்னும் உறுதியாகவில்லை என ஈரான் வெளியுறவு அமைச்சக பேச்சாளர் தெரிவித்துள்ளார்.
இந்த ஒப்பந்தம் இறுதி வடிவம் பெற்றால், மத்திய கிழக்கில் நிலவும் பதற்றத்தை குறைப்பதோடு, உலகளாவிய எண்ணெய் சந்தை மற்றும் பிராந்திய பாதுகாப்பு சூழலிலும் முக்கிய தாக்கத்தை ஏற்படுத்தும் என எதிர்பார்க்கப்படுகிறது.
