தவாவ், 11/05/2025 : மதானி அரசாங்கம் சபாவில் 144 மேம்பாட்டுத் திட்டங்களைச் செயல்படுத்தியுள்ளது, இதுவரை மொத்தம் RM14 பில்லியன் ஒதுக்கீடு செய்யப்பட்டுள்ளது.
பிரதமர் டத்தோஸ்ரீ அன்வார் இப்ராஹிம் கூறுகையில், தவாவ் மருத்துவமனை மற்றும் லஹாத் டத்து சிறைச்சாலையை மேம்படுத்துதல், செபாங்கர் விரிகுடாவில் ஒரு கொள்கலன் துறைமுகத்தை நிர்மாணித்தல் மற்றும் கோத்தா கினாபாலுவில் ஒரு இருதய மருத்துவ மையத்தை நிர்மாணிப்பதற்கான முன்மொழிவு ஆகியவை இதில் அடங்கும்.
“மின்சாரச் செலவுகள், எரிசக்திச் செலவுகள், குழந்தைகளின் பள்ளித் தேவைகள், கழிப்பறைகள், அறிவியல் ஆய்வகங்கள், அத்துடன் காவல் மற்றும் ராணுவ வீரர்களின் வீட்டுவசதி மற்றும் சாலை பழுதுபார்ப்பு போன்ற தேவைகளை நிவர்த்தி செய்வது உட்பட மக்களுக்குச் சிறந்ததைச் செய்வோம்” என்று அவர் கூறினார்.
இங்குள்ள தவாவ் நகராட்சி மன்ற சதுக்கத்தில் சபா மாநில அளவிலான மதானி ராக்யாட் (பிஎம்ஆர்) 2025 திட்டத்தின் நிறைவு விழாவை தலைமை தாங்கி உரையாற்றும் போது அவர் இவ்வாறு கூறினார்.
பிரதமரின் கூற்றுப்படி, கடந்த இரண்டு ஆண்டுகளில், மதானி அரசாங்கத்தால் பல்வேறு முயற்சிகள் மேற்கொள்ளப்பட்டுள்ளன, ஆனால் இன்னும் சில தடைகள் உள்ளன என்பதை அவர் ஒப்புக்கொண்டார்.
விழாவில் சபா முதல்வர் டத்தோஸ்ரீ ஹாஜி நூர் கலந்து கொண்டார்; தொழில்முனைவோர் மற்றும் கூட்டுறவு மேம்பாட்டு அமைச்சர் டத்தோ இவான் பெனடிக் மற்றும் விவசாயம் மற்றும் உணவு பாதுகாப்பு அமைச்சர் டத்தோஸ்ரீ முகமட் சாபு.
அதைத் தவிர, உள்நாட்டு வர்த்தகம் மற்றும் வாழ்க்கைச் செலவு அமைச்சர் டத்தோ அர்மிசான் முகமது அலி; அறிவியல், தொழில்நுட்பம் மற்றும் புதுமை அமைச்சர் சாங் லி காங் மற்றும் மக்களவைத் தலைவர் டான் ஸ்ரீ ஜோஹாரி அப்துல்; அரசாங்கத்தின் தலைமைச் செயலாளர் டான் ஸ்ரீ ஷம்சுல் அஸ்ரி அபு பக்கர் மற்றும் காவல்துறைத் தலைவர் டான் ஸ்ரீ ரசாருதீன் ஹுசைன் ஆகியோர் கலந்து கொண்டனர்.
