கோலாலம்பூர், 20 அக்டோபர் 2026 : நேபாள–திபெத் வெள்ளப் பேரிடரில் காணாமல் போன 54 மலேசியர்களின் குடும்பங்களுக்கு அவசர மனிதாபிமான உதவி வழங்கவும், சட்ட மற்றும் நிதி விவகாரங்களை ஒருங்கிணைக்கவும் மலேசிய ஒற்றுமைக் குடும்பங்கள் நம்பிக்கை அமைப்பு (MASFIH) அரசாங்கத்திடம் கோரிக்கை விடுத்துள்ளது.
இதுதொடர்பாக, மலேசியப் பிரதமர் டத்தோஸ்ரீ அன்வார் இப்ராஹிமை MASFIH பிரதிநிதிகள் இன்று நாடாளுமன்றத்தில் சந்தித்துப் பேசினர். அப்போது, பாதிக்கப்பட்ட குடும்பங்களுக்கான ஒன்பது முன்னுரிமை நடவடிக்கைகளை உள்ளடக்கிய 29 பக்க முன்மொழிவையும் சமர்ப்பித்தனர்.
சம்பவம் நிகழ்ந்து 56 நாட்கள் கடந்துள்ள நிலையில், குடும்பங்கள் தங்களது அன்புக்குரியவர்களின் நிலை குறித்த நிச்சயமற்ற சூழலுடன், கடன் பொறுப்புகள் மற்றும் சட்ட நடைமுறைகளையும் எதிர்கொண்டு வருகின்றன.
பிரதமர் அன்வார், நேபாளப் பிரதமருடன் இந்த விவகாரம் குறித்து பேசியுள்ளதாகவும், மலேசியாவின் சட்டத்துறைத் தலைமை அலுவலகம் (AGC), நேபாள அரசாங்கத்துடன் தொடர்புகொண்டு சட்ட நடைமுறைகளை ஆராயுமாறு கேட்டுக்கொண்டுள்ளதாகவும் MASFIH தெரிவித்தது.
வரும் அக்டோபர் 23ஆம் தேதி நடைபெறவுள்ள அமைச்சரவைக் கூட்டத்தில், அரசாங்கத்தின் நடவடிக்கைகளை ஒருங்கிணைக்க தேசிய ஒருங்கிணைப்பாளர் ஒருவரை நியமிப்பது மற்றும் பாதிக்கப்பட்ட 54 குடும்பங்களுக்கும் ஒருமுறை மத்திய அரசின் மனிதாபிமான நிதியுதவி வழங்குவது ஆகிய இரண்டு முன்மொழிவுகள் பரிசீலிக்கப்படும் எனத் தெரிவிக்கப்பட்டுள்ளது. இவை அரசாங்கத்தின் இறுதி முடிவுக்கு உட்பட்டவை என்றும் MASFIH குறிப்பிட்டது.
மேலும், காணாமல் போனவர்களின் அதிகாரப்பூர்வ நிலையை உறுதிப்படுத்தும் ஆவணங்கள், காப்பீடு மற்றும் தகாஃபுல் கோரிக்கைகள், கடன் நிவாரணம், சொத்துப் பாதுகாப்பு, வாரிசுரிமை தொடர்பான சட்ட உதவி ஆகியவற்றுக்கும் நடவடிக்கை எடுக்க வேண்டும் என அந்த அமைப்பு வலியுறுத்தியது. நேபாளம் மற்றும் சீனாவின் திபெத் தன்னாட்சிப் பகுதிக்கான உயர்மட்டத் தூதரகப் பயணத்தையும் முன்மொழிந்துள்ளது.
காணாமல் போனவர்களின் நிலையை உறுதிப்படுத்தும் ஆவணங்களைக் கோருவது, அவர்கள் உயிரிழந்துவிட்டதாகக் கருதுவதற்குச் சமமல்ல என்றும் MASFIH தெளிவுபடுத்தியது. குடும்பங்கள் தொடர்ந்து நம்பகமான தகவல்களைத் தேடிக்கொண்டிருக்கும் அதேவேளையில், அவர்களின் சட்ட மற்றும் நிதி நலன்களையும் பாதுகாக்க வேண்டியது அவசியம் எனத் தெரிவித்தது.
MASFIH ஒருங்கிணைப்பாளரும் பேச்சாளருமான டாக்டர் மணிவண்ணன் ரெத்தினம், பாதிக்கப்பட்ட அனைத்து குடும்பங்களுக்கும் சமமான உதவி, சட்டத் தெளிவு மற்றும் நடைமுறை நடவடிக்கைகள் கிடைக்க வேண்டும் என வலியுறுத்தினார்.
