பெட்டாலிங் ஜெயா, 14 அக்டோபர் 2026 : மலேசியா முழுவதும் SPM மற்றும் STPM பொதுத்தேர்வுகளில் தமிழ்மொழிப் பாடத்தை எழுதவுள்ள 8,690 மாணவர்கள், மலேசிய இந்தியச் சமூக உருமாற்றப் பிரிவான MITRA முன்னெடுக்கும் 2026 தமிழ்மொழித் தேர்ச்சி மேம்பாட்டுத் திட்டத்தின் மூலம் பயனடைகின்றனர். இத்திட்டத்திற்காக மொத்தம் RM901,680 நிதி ஒதுக்கப்பட்டுள்ளது. மனிதவள அமைச்சின் (KESUMA) கீழ் செயல்படுத்தப்படும் இத்திட்டம், மலேசியக் கல்வி அமைச்சுடன் (KPM) இணைந்து முன்னெடுக்கப்படுகிறது.
மாணவர்களின் கல்விச் செயல்திறனை மேம்படுத்துதல், தமிழ்மொழிப் புலமையை வலுப்படுத்துதல் மற்றும் இந்தியச் சமூக மாணவர்களுக்குத் தேவையான கல்வி ஆதரவை வழங்குதல் ஆகியவை இத்திட்டத்தின் முக்கிய நோக்கங்களாகும். மேலும், தேர்வுகளை எதிர்கொள்ள மாணவர்களின் ஊக்கம், தன்னம்பிக்கை மற்றும் தயார்நிலையை அதிகரிக்கும் வகையில் சிறப்புக் கல்விப் பயிற்சிகளும் வழங்கப்படுகின்றன.
மொத்தப் பயனாளிகளில் 7,897 பேர் SPM மாணவர்கள்; 793 பேர் STPM மாணவர்கள் ஆவர். இவர்கள் நாடு முழுவதும் தமிழ்மொழிப் பாடத்தேர்வில் பங்கேற்கவுள்ளனர்.
இத்திட்டத்தின் ஒரு பகுதியாக, சிலாங்கூரைச் சேர்ந்த சுமார் 300 SPM மாணவர்களும் 50 கல்வியாளர்களும் இன்று பெட்டாலிங் ஜெயாவில் உள்ள Menara BAC, Omnia Auditorium அரங்கில் நடைபெற்ற நிகழ்ச்சியில் பங்கேற்றனர். மனிதவள அமைச்சர் டத்தோஸ்ரீ ரமணன் ராமகிருஷ்ணன் நிகழ்ச்சியைத் தொடங்கி வைத்தார்.
அப்போது பேசிய அமைச்சர், மாணவர்களின் பின்னணியைப் பொருட்படுத்தாமல் அனைவருக்கும் கல்வியில் சிறந்து விளங்குவதற்கான வாய்ப்புகளை உறுதிசெய்வதே அரசாங்கத்தின் நோக்கம் என்றார். MITRA மூலம் கல்வி உதவிகள் மட்டுமின்றி, மாணவர்களின் தேர்வு முடிவுகளில் நேரடித் தாக்கத்தை ஏற்படுத்தக்கூடிய கல்விசார் தலையீடுகளும் முன்னெடுக்கப்படுவதாகக் குறிப்பிட்டார்.
தமிழ்மொழி என்பது தேர்வில் மதிப்பெண் பெறுவதற்கான ஒரு பாடம் மட்டுமல்ல; அது மொழி, பண்பாடு மற்றும் அடையாளத்தைப் பாதுகாக்கும் செல்வம் என்றும், அடுத்த தலைமுறையினரிடம் அதைத் தொடர்ந்து கொண்டு செல்வது அவசியம் என்றும் அவர் வலியுறுத்தினார்.
மேலும், Kalvi MADANI திட்டத்தின் கீழ் கல்வி சார்ந்த முயற்சிகளை MITRA தொடர்ந்து விரிவுபடுத்தும். மலேசியக் கல்வி அமைச்சு, மாநிலக் கல்வித் துறைகள் (JPN) மற்றும் தொடர்புடைய கல்வி நிறுவனங்களுடன் இணைந்து, இந்தியச் சமூகத்தைச் சேர்ந்த மேலும் பல மாணவர்களுக்கு இலக்குடன் கூடிய பயனுள்ள கல்வி ஆதரவை வழங்க நடவடிக்கை எடுக்கப்படும் எனத் தெரிவிக்கப்பட்டுள்ளது.
