பட்டர்வொர்த், 14 அக்டோபர் 2026 : மலேசிய இந்து சங்கத்தின் பட்டர்வொர்த் உள்ளூர் மன்றம், சுற்றுச்சூழல் பாதுகாப்பு, தூய்மை மற்றும் நிலையான வாழ்க்கை முறையை ஊக்குவிக்கும் நோக்கில், “தெய்வீக மறுசுழற்சித் திட்டம் 2026” நிகழ்ச்சியை அக்டோபர் 11-ஆம் தேதி நடத்தியது.
மக் மண்டினில் உள்ள அருள்மிகு ஸ்ரீ முருகன் கோவில் பரிபாலன சபை வளாகத்தில் காலை 9.30 மணி முதல் மதியம் 12.30 மணி வரை நிகழ்ச்சி நடைபெற்றது.
மலேசிய இந்து சங்கத்தின் பட்டர்வொர்த் உள்ளூர் மன்றத் தலைவர் சங்கரத்னா தேவரநாயகம் டத்தோ ஜி. சண்முகநாதன் மற்றும் அச்சங்கத்தின் பட்டர்வொர்த் கோவில் ஒருங்கிணைப்புப் பிரிவுத் தலைவர் ஆர். சரவணன், பி.ஜே.எம். ஆகியோரின் தலைமையில் இத்திட்டம் ஏற்பாடு செய்யப்பட்டது.
மலேசிய இந்து சங்கத்தின் பினாங்கு மாநில மன்றம் இந்நிகழ்ச்சிக்கு ஆதரவு வழங்கியது. மாநில மன்றத்தின் துணைத் தலைவர் விவேக ரத்னா எஸ். சத்தியசீலன், கோவில் மற்றும் சமயப் பிரிவுத் தலைவர் என்ற முறையிலும், உதவிப் பொருளாளர் விவேக ரத்னா பி. பூங்கொடி, கோவில் மற்றும் சமயப் பிரிவின் துணைத் தலைவர் என்ற முறையிலும் இத்திட்டத்திற்கு ஆதரவளித்தனர்.
மக் மண்டின் அருள்மிகு ஸ்ரீ முருகன் கோவில் பரிபாலன சபையுடன் இணைந்து நிகழ்ச்சி நடத்தப்பட்டது. அச்சபையின் தலைவர் உதேய்குமார் ஒத்துழைப்பு வழங்கினார். சிறப்பு விருந்தினராக எம்.பி.எஸ்.பி. மன்ற உறுப்பினர் லிங்கேஸ்வரன் சர்மார் கலந்து சிறப்பித்தார்.
மறுசுழற்சி, மறுபயன்பாடு, கழிவுகளைக் குறைத்தல் மற்றும் வளங்களைப் புதுப்பித்துப் பயன்படுத்துதல் ஆகியவற்றின் முக்கியத்துவத்தை சமூகத்திடம் எடுத்துரைப்பதே இத்திட்டத்தின் நோக்கமாகும். சுற்றுச்சூழலைப் பாதுகாப்பதில் சமூகத்தின் பங்களிப்பை அதிகரித்து, தூய்மையான மற்றும் பசுமையான எதிர்காலத்தை உருவாக்க அனைவரும் ஒன்றிணைந்து செயல்பட வேண்டும் என்றும் நிகழ்ச்சி வலியுறுத்தியது.
