நெகிரி செம்பிலான், 10 அக்டோபர் 2026 : தீபாவளிப் பண்டிகையை முன்னிட்டு, மைடின் மலேசியா நிறுவனம் ஏற்பாடு செய்துள்ள ‘A Brighter Deepavali’ விற்பனைச் சந்தையின் தொடக்க நிகழ்ச்சி, நெகிரி செம்பிலான் மாநிலம் சிரம்பான் 2-இல் உள்ள மைடின் பேரங்காடியில் நடைபெற்றது. இந்நிகழ்ச்சியில் யுனேஸ்வரன் ராமராஜ் சிறப்பு விருந்தினராகக் கலந்துகொண்டார். இந்த ஆண்டின் தீபாவளிக் கொண்டாட்டத்தை முன்னிட்டு அவர் பங்கேற்ற முதல் நிகழ்ச்சியாகவும் இது அமைந்தது.
நிகழ்ச்சியின் சிறப்பம்சமாக, மலேசியாவில் இதுபோன்று முதன்முறையாக அமைக்கப்பட்டதாகக் கூறப்படும் சுழலும் கோலத்தை யுனேஸ்வரன் ராமராஜ் பார்வையிட்டார். இந்தியப் பாரம்பரியக் கலையான கோலம், செழிப்பு, நல்வாழ்வு மற்றும் இல்லத்திற்கு வருகை தரும் விருந்தினர்களை அன்புடன் வரவேற்கும் பண்பாட்டின் அடையாளமாக விளங்குகிறது.
இந்நிகழ்ச்சியின் மூலம் பண்டிகைக் கொண்டாட்டத்தைத் தாண்டி சமூக நலனுக்கும் முக்கியத்துவம் அளிக்கப்பட்டுள்ளது. மைடின் நிறுவனமும் அதன் விநியோகப் பங்காளர்களும் இணைந்து, நாடு முழுவதும் தேர்ந்தெடுக்கப்பட்ட 15 நல இல்லங்களுக்கு RM100,000 மதிப்பிலான ரொக்கப் பற்றுச்சீட்டுகள் மற்றும் அத்தியாவசியப் பொருட்களை வழங்கவுள்ளன.
மேலும், தேர்ந்தெடுக்கப்பட்ட மைடின் கிளைகளில் வைக்கப்பட்டுள்ள நன்கொடைப் பெட்டகங்கள் மூலம் பொதுமக்களும் தங்களால் இயன்ற உதவிகளை வழங்கலாம். மகிழ்ச்சி, அன்பு மற்றும் ஆதரவைத் தேவைப்படுவோருடன் பகிர்ந்துகொள்வதே பண்டிகைகளின் உண்மையான சிறப்பு என யுனேஸ்வரன் ராமராஜ் குறிப்பிட்டார்.
பல இனங்களையும் கலாசாரங்களையும் கொண்ட மலேசியாவில், ஒருவரது கலாசாரத்தை மற்றவர் புரிந்துகொண்டு, வேறுபாடுகளை மதித்து, மகிழ்ச்சியைப் பகிர்ந்துகொள்வதன் மூலம் சமூகங்களுக்கிடையிலான ஒற்றுமையையும் நல்லிணக்கத்தையும் வலுப்படுத்த முடியும் என்றும் அவர் தெரிவித்தார்.
இக்கொண்டாட்டத்தை ஏற்பாடு செய்த மைடின் மலேசியா நிறுவனத்திற்கும், நிகழ்ச்சியை வெற்றிகரமாக நடத்தப் பங்களித்த அனைவருக்கும் அவர் நன்றி தெரிவித்தார். தீபாவளி அனைவரது வாழ்விலும் மகிழ்ச்சி, செழிப்பு மற்றும் நல்லிணக்கத்தைக் கொண்டுவர வேண்டும் என்றும் வாழ்த்தினார்.
