ஜோகூர் பாரு, 24 மே 2026 : ஜோகூர் பாருவில் நடைபெற்ற “உலக சமையல் சாம்பியன்ஷிப் 2026” போட்டியில் KEMAS அணி மொத்தம் 49 பதக்கங்களை வென்று மலேசியாவுக்கு பெருமை சேர்த்துள்ளது.
இந்த சர்வதேச சமையல் போட்டியில் கலந்து கொண்ட KEMAS அணியின் 49 போட்டியாளர்களில் 48 பேர் பதக்கங்களை கைப்பற்றி சிறப்பான சாதனை படைத்துள்ளனர். போட்டியில் KEMAS அணி 8 “சிறந்த தங்கப் பதக்கங்கள்”, 10 தங்கப் பதக்கங்கள், 24 வெள்ளிப் பதக்கங்கள் மற்றும் 6 வெண்கலப் பதக்கங்களை வென்றது.
பல்வேறு மாநிலங்களைச் சேர்ந்த பயிற்றுநர்கள், திறன் பயிற்சி மாணவர்கள் மற்றும் மாநில பிரதிநிதிகள் KEMAS அணியில் இடம்பெற்றிருந்தனர். அவர்கள் நவீன திருமண கேக் வடிவமைப்பு, படைப்பாற்றல் மூன்கேக், பாரம்பரிய உணவுகள், பாஸ்தா சவால், பாஸ்ட்ரி மற்றும் பன் தயாரிப்பு உள்ளிட்ட பல்வேறு பிரிவுகளில் பங்கேற்றனர்.
இந்த ஆண்டு நடைபெற்ற உலக சமையல் சாம்பியன்ஷிப், பங்கேற்ற நாடுகள், சர்வதேச நடுவர்கள் மற்றும் போட்டியாளர்களின் எண்ணிக்கையை அடிப்படையாகக் கொண்டு ASEAN Records மற்றும் ஆசியா ரெக்கார்ட்ஸ் அமைப்புகளால் மிகப்பெரிய சர்வதேச சமையல் போட்டியாக அங்கீகரிக்கப்பட்டுள்ளது.
மலேசியாவைத் தவிர தாய்லாந்து, புரூணை, இந்தோனேசியா, ஹொங்கொங், தைவான், சிங்கப்பூர், சீனா, பெரு, கனடா மற்றும் வியட்நாம் உள்ளிட்ட பல நாடுகளும் இந்தப் போட்டியில் பங்கேற்றன. KEMAS அணியின் இந்த வெற்றி, மலேசிய சமையல் திறமையை உலக அரங்கில் மேலும் உயர்த்தியுள்ளதாக பாராட்டப்படுகிறது.
