கோலாலம்பூர், 10 மார்ச் 2026 : மலேசியாவின் முக்கிய இந்து விழாக்களில் ஒன்றான தைப்பூசத் திருவிழாவை முன்னிட்டு, இந்த ஆண்டு (2026) நடத்தப்பட்ட ரத்த தான இயக்கத்தில் இதுவரை இல்லாத அளவுக்கு 1,872 பைகள் ரத்தம் சேகரிக்கப்பட்டு புதிய சாதனை படைக்கப்பட்டுள்ளது.
டத்தோ சிவகுமார் (DSK) அவர்களின் முன்னெடுப்பில் நடைபெற்ற இந்த ரத்த தான இயக்கத்தில், மலேசியாவின் பல இனங்கள் மற்றும் மதங்களைச் சேர்ந்த மக்கள் பெரும் திரளாகக் கலந்து கொண்டு ஆதரவு வழங்கினர். இந்த முயற்சி சமூக ஒற்றுமையும் மனிதநேயமும் வெளிப்படுத்தும் சிறந்த நிகழ்வாக அமைந்தது.
“ரத்தம் இனம் அல்லது மதத்தைப் பார்ப்பதில்லை; அது உயிர்களை காப்பாற்றுவதையே அறிவது” என்ற தாரக மந்திரத்துடன் இந்த இயக்கம் முன்னெடுக்கப்பட்டது. நாட்டில் தேவையற்ற இன வேறுபாடுகளைத் தவிர்த்து, அனைவரும் ‘ஒரே மலேசியா’ என்ற உணர்வுடன் ஒன்றிணைய வேண்டும் என்ற செய்தியும் இந்த நிகழ்வின் மூலம் வலியுறுத்தப்பட்டது.
#DemiSatuKemanusiaan (ஒரே மனிதநேயத்திற்காக) என்ற முழக்கத்தின் கீழ் நடைபெற்ற இந்த ரத்த தான முகாம், மனிதநேயத்தை போற்றும் ஒரு முக்கிய சமூக சேவை நிகழ்வாக அமைந்தது.
நிகழ்வில் பேசிய டத்தோ சிவகுமார், ரத்த தானம் செய்வது உயிர்களை காப்பாற்றும் உயரிய செயல் மட்டுமல்லாமல், மக்களிடையே ஒற்றுமையை வலுப்படுத்தும் ஒரு பாலமாகவும் செயல்படுகிறது என்று தெரிவித்தார்.
இந்த இயக்கத்தின் மூலம் சேகரிக்கப்பட்ட 1,872 ரத்தப் பைகள் நாட்டின் ரத்த வங்கிகளுக்கு வழங்கப்பட்டு, அவசர சிகிச்சை தேவைப்படும் நோயாளிகளின் உயிரைக் காக்க பயன்படுத்தப்படவுள்ளதாக தெரிவிக்கப்பட்டுள்ளது.
